પૂર્વ કચ્છમાં પોલીસે હથિયારબંધી જાહેરનામાનો ભંગ કરનારા 48 શખ્સોની ધરપકડ કરી છે. પોલીસ અધિક્ષક સાગર બાગમારની સૂચના મુજબ શરીર સંબંધી ગુનાઓને અટકાવવા માટે આ વિશેષ ઝુંબેશ હાથ ધરવામાં આવી હતી.
અંજાર વિભાગના નાયબ પોલીસ અધિક્ષક મુકેશ ચૌધરી અને ભચાઉ વિભાગના નાયબ પોલીસ અધિક્ષક સાગર સાંબડાના માર્ગદર્શન હેઠળ આ કાર્યવાહી કરવામાં આવી. 17 તારીખે હાથ ધરાયેલી આ ઝુંબેશમાં જિલ્લાના તમામ પોલીસ સ્ટેશનોને હથિયારબંધી જાહેરનામાના કેસો શોધવાની સૂચના આપવામાં આવી હતી.
પકડાયેલા શખ્સો પાસેથી છરી, ધારીયું, કુહાડી, લાકડાનો અને વાંસનો ધોકો જેવા હથિયારો મળી આવ્યા છે. આ કાર્યવાહી અંજાર, ગાંધીધામ, આદિપુર, ભચાઉ, રાપર અને અડેસર પોલીસ સ્ટેશન વિસ્તારમાં કરવામાં આવી હતી. તમામ પકડાયેલા શખ્સો વિરુદ્ધ જાહેરનામા ભંગના કેસો દાખલ કરી કાયદેસરની કાર્યવાહી શરૂ કરવામાં આવી છે.
